De Heibergske samlingar - Sogn folkemuseum

De Heibergske Samlinger - Sogn Folkemuseum er distriktsmuseum for Sogn. Frå 2009 er museet ei avdeling i organisasjonen Musea i Sogn og Fjordane. Museet har samla gjenstader frå alle dei 12 kommunane i Sogn, og har no hovudansvar for dei 9 kommunane i midtre og indre Sogn.

Museet ligg på Vestreim på Kaupangerskogen. Her er friluftsmuseum med om lag 35 bygningar som i tid spenner frå 1500-talet og fram til 1989. Husa er plasserte i tun og i opparbeidd kulturlandskap. Museet driv gardsbruk med dyr. Friluftsmuseet inneheld og fire ulike naturhistoriske aktivitetsløyper og to leikeplassar.

I eigen utstillingsbygning finst permanente utstillingar som syner landbruk, hushald, bygdehandverk, tekstilproduksjon, kosthald, handel, klesskikkar, religiøse høgtider, seder og skikkar frå tidlegare tider. Her er og spesialutstillingar for born og unge. Samlinga med jordbruks- og handverksreiskap er ei av dei største i landet. Kvart år vert det vist ulike temporære utstillingar.

Museet har kafé og museumsbutikk.

Sogn Fjordmuseum er ei eiga avdeling ved museet, lokalisert ved Kaupanger ferjekai. Her er ei stor samling bruksbåtar frå Sogn, og elles utstillingar knytt til båtbygging og fiske.

Telefon: 57 67 82 06
Telefaks: 57 67 85 11
E-post: sogn.folkemuseum@dhs.museum.no