Følg RV 55 til Fardal, ca 8 km vest for Sogndalsfjøra utover mot Leikanger. Ta av til høgre like før Fardalsfossen på vegen som går i hårnålssvingar oppover Øvstedalen. Vidare om lag 5 km innover dalen, til snuplassen for bussane. Vidare innover er det privat veg (stengt med bom). Herifrå er det fleire fine turar.
Skriki
(1227 m.o.h) Dette er den mest krevjande turen, og du kan velje mellom to alternativ. Du må rekna med 5-7 timar t/r Skriki. Turen ned kan gå til Slinde, Nornes eller Ølmheim.
 

Alt. 1
Kryss elva på bru like nedanfor snuplassen til bussane og følg stien opp til Kinnstølane. Vidare vert stien dårleg. Ruta går forbi Skriksvatnet. Dette er det mest krevjande alternativet, men det raskaste. Likevel må du rekne med 6-7 timar t/r.
Alt. 2
Hald fram på vegen innover frå snuplassen til Bjønndalsetra. Følg stien som går vestover frå setra og vidare oppover langs Bjønndalsgrovi. Etterkvart vert stien borte. Ruta går til Havravatnet og bratt opp til og over Mjellhaugane. Opp til toppen av Skriki går ein frå sør.

Bjønndalen
Det øvste området inn Bjønndalen eignar seg godt for lettare turar òg for familiar med små born. Mange av stølane i Bjønndalen er enno i bruk og syner ei levande kulturhistorie. Terrenget er lett å ta seg fram i. Ein fin, litt bratt tur er opp lia til det idylliske skogsvatnet Svartavatnet. Bjønndalen er og eit utmerka utgangspunkt for ein tur opp til Fjærlandsetevatnet (783 m.o.h.)

Øyragrendi
Ein koseleg og lett familietur kan ein òg ta langs vegen til Øyragrendi. Her kjem ein forbi eit vakkert kulturlandskap med lysopne bjørkehagar og gamle lauvingstre samstundes som ein har storfelt utsyn over fjorden.