Inviterer til opning av Saften og Drægnisalen

Laurdag 3. oktober markerer me at Saften-prosjektet på Leikanger står klart. Det blir omvising, servering, kjekke aktivitetar rundt på huset og program i den nye kultursalen.

Prosjektet i Saften omfattar ei stor ombygging og oppgradering av rundt 4000 kvadratmeter. Arbeidet starta i 2025 og har mellom anna gitt nye administrasjonslokale for kommunen, ny kultursal og oppgraderte areal for bibliotek, ungdomsklubb, frivilligsentral og andre funksjonar i huset.

Prosjektet har handla om meir enn å pusse opp eksisterande lokale. Areala er bygde om for å samle fleire funksjonar, legge betre til rette for sambruk og skape meir fleksible lokale. Samtidig er tekniske løysingar og universell utforming oppgradert, og det er gjennomført betydelege tiltak knytte til brann- og konstruksjonstryggleik.

Det er òg lagt vekt på gjenbruk. Mellom anna er parkett, golvfliser, himlingsplater, glasvegger, dører og tekniske installasjonar brukte om att. Nokre stader er eksisterande betong behalden som ferdig overflate, og materialar som ikkje kunne nyttast vidare i prosjektet, er sende til ombruk andre stader.

Målet har vore å vidareutvikle Saften som eit fleirbrukshus og ein møteplass for både tilsette, innbyggjarar, frivilligheita og kulturlivet.

Mange har alt teke bygget i bruk, og laurdag 3. oktober under Fruktbare dagar blir det ei offisiell opning av Saften, der publikum blir inviterte inn i kulturstova Drægnisalen.