Velkommen til nyoppussa musikkbinge

Musikkbingen på Leikanger har fått seg eit skikkeleg løft.

Øvingslokalet på Leikanger, sentralt plassert i sentrum på nedsida av vegen ved Henjaelvi, fyller i år 15 år. Og då var det på tide med ei oppgradering.

Både for unge og erfarne

Rom med lysegule veggar og musikkutstyr.

- Rommet har fått ein meir moderne utsjånad, i tillegg har me fått ny lydmiksar og diverse anna utstyr, fortel Tor Talle, kultur- og ungdomsarbeidar i Sogndal kommune, med særleg ansvar for Leikanger.

Musikkbingen er utstyrt med trommesett, gitarforsterkarar, bassforsterkar, keyboard, lydanlegg, gitar og bassgitar.

Talle, som også har starta opp ungdomsklubben på Leikanger, frå denne hausten i heilt nye lokale på Saften, håper musikkbingen vil bli mykje brukt framover, både av unge og meir erfarne musikarar.

- Viss det er nokon som treng litt hjelp eller råd for å koma i gang, er det berre å ta kontakt. Eg er mellom anna å treffa på ungdomsklubben på onsdagar, seier Talle.