Ny kommunedirektør er på plass

Anne Karin Hamre er tilsett som kommunedirektør i Sogndal kommune og hadde sin første arbeidsdag 9. november.

Anne Karin Hamre kjem frå stillinga som direktør for Vestlandsforsking. Ho har tidlegare vore ekspedisjonssjef i Kommunal- og distriktsdepartementet og fylkesmann i Sogn og Fjordane frå 2011 til 2018. Hamre har hovudfag i statsvitskap frå Universitetet i Bergen og gjennomførte sjefskurset ved Forsvarets høgskole i 2018.

Hamre har omfattande leiarerfaring frå statleg og regional offentleg sektor. Gjennom fleire sentrale leiarroller har ho arbeidd tett opp mot politisk styrte verksemder og komplekse organisasjonar. Ho har erfaring med organisasjonsutvikling, strategisk leiing og samhandling mellom ulike forvaltningsnivå, og har gjennom karrieren leia omfattande utviklings- og endringsprosessar.

Hamre har også bakgrunn som assisterande fylkesmann, administrasjonssjef, høgskulelærar og journalist. Vidare har ho brei erfaring frå styre- og utvalsarbeid, mellom anna som styremedlem i Helse Vest, styreleiar i Veterinærinstituttet, styremedlem i Abelia, Initiativ Vest og Noregs forskingsråd sitt porteføljestyre for innovasjon.

- Eg ynskjer Anne Karin velkommen til oss, og me er veldig glade for at ho no er på plass i kommunen, seier ordførar Stig Ove Ølmheim.