Måndag 18. august startar eit nytt skuleår, og mange små skal gå og sykla til og frå skulen. Greiner som heng ut i vegen eller gangvegen kan hindra sikt.
Ta ein sjekk før skulestart
Vegetasjon frå privat eigedom som heng ut i offentleg veg, eller som hindrar sikt, er du som grunneigar sjølv ansvarleg for.
Me håpar alle i Sogndal kommune vert med på dugnaden, finn fram hekksaksa si, og bidreg til eit sikrare trafikkbilete for mjuke trafikkantar. Sjekk også om du har greiner som hindrar sikt til skilt eller lyktestolpar.
- I Sogndal kommune har mange grunneigarar planta for å få det fint. Det synest me er veldig kjekt. Fine stelte grøntområde er godt for sjela. Problemet er at at nokre av buskene og hekkane har vakse seg så store at dei har kome ut i vegbana. Dette kan gå utover trafikktryggleiken for mjuka trafikantar, og det går utover køyrande då vegen har vorte smalare og meir uoversiktleg, seier Torgeir Bang, tenesteleiar for teknisk drift i Sogndal kommune.
Han opplyser at kommunen ikkje har kapasitet til å klippa for private.
-Me gjer så godt me kan langs kommunale vegar med kantklipping og ved kommunal eigedom der våre hekka har vakse seg for store. Me har framleis litt å gå på her òg.
Ser du kommunal vegetasjon som hindrar sikt, kan du melda frå her: Meld frå om feil og manglar
Berre ein halv meter
Trygg Trafikk er også opptekne av tryggleiken til skuleborn, og har sendt ut ei pressemelding der de oppmodar folk om å klippe hekkane i samband med skulestart.
Når du står tre meter inn i avkøyrsla di skal du ha minst 30 meter fri sikt i kvar retning langs gang- og sykkelvegen, ifølge veglova. Hekk og gjerde skal heller ikkje vere høgare enn 50 centimeter ved avkøyrsla. Om avkøyrsla munnar ut i ein veg med fartsgrense 50 km/t, må det vere fire meter fri sikt inn og 45 meter til kvar side når du står inne i avkøyrsla di, ifølgje Statens vegvesen si temaside om vegetasjonsrydding.