Nytt skule- og barnehageår er i gang

702 barnehagebarn og 1509 elevar tek i desse dagar spent fatt på det nye året.

- Det er eit mangfald av barn og unge som alle har ulike føresetnadar, behov, interesser, mål og draumar, seier Frode Grøttebø, tenesteleiar for skule i Sogndal kommune.

I Sogndal sentrum er det teke i bruk nye skulebygg, både for Trudvang og Kvåle skule.

Kvåle skule har auka klassetal og har teke i bruk nytt modullbygg for å ha tilstrekkeleg klasseromskapasitet.

Trudvang skule har teke i bruk Guridalsbygget på Campus for å gje opplæring til 4. – 5. trinn.

- Bygget er sett i stand i sommar og har gode område både til opplæring og leik. Det har vore ein god prosess med føresette og tilsette for korleis denne løysinga skal vere best mogleg med tanke på både organisering, logistikk og pedagogikk. I prosessen har det vore god dialog med miljøretta helsevern og partsamarbeidet på skulen for å vere trygg på at elevane startar skuleåret i eit godt skulebygg. Dei tilsette på skulen har saman med entrepenørane gjort ein strålande jobb for å gjere bygget klart til bruk, fortel Grøttebø.

Utvalsleiarane Rune Haug (levekår) og Clara Øberg (plan og samfunn) vitja måndag Guridalsbygget, saman med Kenth-Rune Teigen Måren, kommunalsjef oppvekst, og kommunedirektør Tor-Einar Skinlo.

I kommunen har me åtte grunnskular, og ti kommunale og fire private barnehagar. I tillegg gjev me opplæring til vaksne på Sogndal opplæringssenter og leirskuletilbod på Korall leirskule.