Saka vart handsama i møte 02.04.2025 i sak 09/2025, og utvalet gjorde dette vedtaket:
- Utval for plan og samfunn vedtek å legge framlegg til detaljreguleringsplan for Hove, plan-id: 4640-2022003, ut til offentleg ettersyn og på høyring.
- Før planen vert lagt ut til offentleg ettersyn og høyring skal følgjande leggast til i føresegnene:
§ 3.1.2 Uteopphaldsareal og leikeplassar
§ 3.1.2.8 Bustadene skal ha tilgang til områdeleikeplass i samsvar med areal- og kvalitetskrav i arealdelen til kommuneplanen. Områdeleikeplass kan løysast utanfor planområdet, gjennom frikjøp av nærliggjande offentlege areal som park eller skulegard med god og trafikksikker tilgjenge.
§ 3.1.3 Parkering og sykkelparkering
§ 3.1.3.2 Leilegheitsbygg skal ha minimum 1,2 bilparkeringsplassar per 100 m2 BRA, i samsvar med krav for sentrumsområde i arealdelen til kommuneplanen. Delar av parkeringskravet kan løysast ved kjøp av parkeringsplassar utanfor planområdet, i samsvar med føresegn om frikjøp i arealdelen til kommuneplanen.
§ 6.3 Før bygning blir teken i bruk
Føreslått tekst i § 6.3.8 vert erstatta med følgjande tekst:
§ 6.3.8 Før det kan gjevast midlertidig bruksløyve for felt BB1 og /eller BB2 skal krav til områdeleikeplass i samsvar med § 3.1.2.8 og parkering i samsvar med §3.1.3.2 vere sikra gjennom signert utbyggingsavtale
- Før planen vert lagt ut til offentleg ettersyn og høyring må endringar jf. vedtakspunkt 2 innarbeidast i planomtalen.
Vedtaket vert gjort etter plan- og bygningslova § 12-11.
Endringane som vart vedtekne er innarbeidde i plandokumenta som er lagt ut til offentleg ettersyn.
Planområdet omfattar området som er vist i kartet, og ligg nord for kulturhuset i Sogndal. Målet med planarbeidet er å leggje til rette for ein urban bustadtypologi, i tråd med intensjonane om fortetting i sentrum. Planlagde reguleringsformål er bustader, både blokker og frittliggjande småhus, med tilhøyrande funksjonar. Negative konsekvensar ved reguleringa er i hovudsak at eit landbruksareal vert bygd ned. Planforslaget følgjer i stor grad opp overordna plan, og legg opp til å løyse kravet om områdeleikeplass og delar av parkeringskravet utanfor planområdet, gjennom ein utbyggingsavtale med kommunen.
Plankart med føresegner, planomtale og andre sentrale dokument i saka er tilgjengeleg i planregisteret.
Merknadar til planarbeidet
Merknader til planforslaget kan rettast skriftleg til Sogndal kommune, pr. e-post til postmottak@sogndal.kommune.no eller pr. brev til Postboks 153, 6851 Sogndal, innan 20.06.2025.
Dersom noko er uklårt kan spørsmål rettast til Sigrid Ølmheim (97 53 43 82 / sigrid.olmheim@sogndal.kommune.no). Forslagsstillar for planen er Aasen og Øvrelid Utvikling AS og Tippetue Arkitekter AS har utarbeidd planforslaget.
