Plangrense Trudvang skule

Plangrensa inkluderer areal til eksisterande skulebygg og vegane rundt, samt Prestegarden og SHOS-bygget. Plangrensa inkluderer også bustader som ligg inntil Plassen, Skulevegen, Leighgota og Dalavegen. Føremålet med å inkludere bustadane i planområdet er å sikre plass til veg eller fortau og avkøyringar frå bustader. Planen inkluderer heile Stitoppen med snarveg frå Dalavegen, og Prestegarden og SHOS-bygget for å regulere uteopphaldsareal til skulen. Plangrensa er gjort romsleg no som planområdet skal varslast, og vil snevrast inn til å gjelde berre dei areala som er naudsynt for gjennomføring av skuleplanen. Grunnen er at det ikkje er avgjort kor hente- og bringesone for elevane skal plasserast, og alle gatene rundt skulen må inkluderast for å greie ut alternativa.

Planinitiativet og oppstartsmøtereferatet

Planinitiativet er eit dokument som framleggsstillar må sende kommunen seinast samstundes som ein ber om eit oppstartsmøte. Planinitiativet er ei enkel utgreiing om kva framleggsstillar ønskjer å leggje til rette for i detaljreguleringsplanen. I oppstartsmøtereferatet ser du korleis planinitiativet er vurdert av planavdelinga i kommunen. Her står det óg kva kommunen vil vurdere når utkastet til reguleringsplanen vert sendt til politisk handsaming.

Planarbeidet

Føremålet med planarbeidet er å regulere utbyggingsområde for ny skule, uteområde til skulen, og vegar rundt skuletomta. Det skal undersøkjast løysing for ny hente- og bringe sone.

Plassering av ei slik sone må sjåast i samanheng med andre trafikkbehov i nærområdet, både knytt til SHOS-bygget og planlagt nytt kollektivknutepunkt på Billagstomta. Planlagd nytt bygg baserer seg på pågåande prosjektering for Trudvang skule.

I planinitiativet vert det føreslege to hente- og bringesone. Ei mindre hente- og bringesone i Leighgota og ei større sør for SHOS-bygget i Plassen. Det skal greiast ut alternativ til plassering av hente- og bringesone. Syner til oppstartsmøtereferatet for fleire detaljar om kva som skal undersøkast i planarbeidet. 

Parallell prosess

Det varslast om parallell byggjesaks- og planhandsaming. Denne prosessen er avklart med plan- og byggjesak i kommunen, slik at sjølve skulebygget blir søkt om som ordinær byggjesak basert på gjendelde plangrunnlag med mellombelse dispensasjonar, samtidig som arbeidet med reguleringsplanen startar opp. 

Det inneber at regulering for sjølve skulebygget vil bli likt bygget slik det er søkt om no. Ettersom utforminga av bygget avklarast gjennom byggjesaka, vil den viktigaste oppgåva til reguleringsplanen bli avklaring av trafikk- og køyremønster, og regulering av uteareala til skulen.

Forhold til gjeldande planar

Planområdet er regulert i områdereguleringsplan 1420-2012006, SOS-Trudvang-Prestadalen og omkringliggande område, vedteke 13.02.2014. Her er aktuell skuletomt regulert til offentleg tenesteyting, og kombinasjonsformål bustad/tenesteyting. Stitoppen er regulert til bygg og anlegg (bustad og helsebygg), og føreslege område for hente- og bringesone er regulert til helsebygg. Gjeldande kommuneplan er kommuneplanen sin arealdel 2013-2023. 

Arealdelen er under revisjon, der neste formelle skritt er 2. gongs høyring. Den er venta vedteken i løpet av 2026. I gjeldande arealdel er heile området regulert til sentrumsføremål. 

Planinitiativet er delvis i tråd med overordna plan. Syner til oppstartsmøtereferatet for fleire detaljar om planstatus. 

Konsekvensutgreiing

Planen er vurdert etter forskrift om konsekvensutgreiing §§6 og 8. Planen er omfatta av §8, og det må vurderast om planen kan få vesentleg verknad for samfunn og miljø (§10). Planen er vurdert etter §10, og vil ikkje få vesentlege verknadar for samfunn og miljø. 

Tema naturfare vil likevel greiast ut i planarbeidet, med tema snøskred, jord- og steinskred og kvikkleire.

Vidare saksgang

Etter varsel om oppstart, følgjer det normalt 4 veker der det er høve til å komma med utsegn og innspel til planen. Fristen for å komme med utsegn er sett til 9. januar 2026, sidan det er juleferie og nyttårsfeiring i veke 52 og 1. 

Utsegn vil bli kommenterte ved innsending av planforslaget. Når planforslaget er klart, vil det først vurderast av planavdelinga ved kommunen, før det blir handsama av planutvalet. Planutval vedtek om planforslaget skal leggjast ut på offentleg ettersyn.

Vedtaket blir annonsert i lokalavis og grunneigarar får nytt brev. Då får du igjen høve til å komma med utsegn til planen. Planen blir eventuelt justert før han blir behandla på nytt i planutvalet som igjen sender han til kommunestyret. Når planen er godkjend av kommunestyret, er han bindande.

Vedtaket blir annonsert, og grunneigarar gitte høve til å klaga på vedtaket, eller krevja erstatning for evt. tap i samband med arealbruken fastlagde i reguleringsplanen.

Utsegn til planen blir ikkje svart på med brev, men følgjer saka til politisk handsaming. Det kan gå noko tid frå det varslast oppstart av planarbeid til planforslaget er klart til handsaming. Det kan også gå noko tid frå høyringsfrist er ute til neste handsaming av saka.

Det er viktig at alle som har utsegn og innspel til planarbeidet sender desse så tidleg som mogleg. Om du har tankar om kva som skal takast omsyn til bør du sende det som merknad allereie no. 

Utsegn og spørsmål til planarbeidet

Spørsmål til planarbeidet kan rettast til:
Fagkyndig plankonsulent: Holar Ola Roald AS v/ Siri M. Ludvigsen
Tlf: 45436130
E-post: sml@holar.no

Sakshandsamar og arealplanleggjar i Sogndal kommune: Sunniva Sørheim
Tlf: 48269139
E-post: sunniva.sorheim@sogndal.kommune.no

Utsegn til planarbeidet kan rettast skriftleg til:
Holar Ola Roald AS v/ Siri M. Ludvigsen, e-post: sml@holar.no, med kopi til Sogndal kommune: postmottak@sogndal.kommune.no

Frist for å gje utsegn til varsel om oppstart er 09.01.2026.