Siktemålet med planen er å legga til rette for å bygga bustader i tråd med arealdel til kommuneplanen. Du kan klaga på vedtaket innan 15.02.2024. Klagen må rettast skriftleg til Sogndal kommune, pr. e-post til postmottak@sogndal.kommune.no eller pr. brev til Postboks 153, 6851 Sogndal. Du kan og krevje erstatning innan 3 år.
Om innhaldet i reguleringsplanen
Reguleringsplan for Hittun består av føremåla konsentrerte småhus, frittliggande småhus, fritidsbustad, offentleg eller privat tenesteyting, energianlegg, uteopphaldsareal, leikeplass, turveg, friområde, veg, fortau og parkeringsplassar.
Vedtak i plan- og samfunnsutvalet 26.10.2023
1. Detaljreguleringsplan for Hittun med plankart dagsett 29.11.2022 og føresegner dagsett 19.09.2023 vert vedteke med følgjande endringar før kunngjering:
- Føresegn 12.2 a vert endra til:
12.2 a «310_1: Skredfaren innanfor denne omsynssona har større årleg sannsyn enn 1/5000. Innanfor omsynssona er det forbod mot tiltak i tryggleiksklasse S3 (jf. byggteknisk forskrift § 7-3) før det er gjennomført sikringstiltak slik at tilstrekkeleg tryggleik vert nådd. Tilstrekkeleg tryggleik må dokumenterast av fagkyndige.»
2. § 4.1.4 «Før rammeløyve skal fagkyndig levere framlegg til avbøtande tiltak knytt til flaum.»
3. Nytt føresegn knytt til omsynssone for naturmiljø:
§ 12.7 «I omsynssone naturmiljø skal kantvegetasjon og naturområdet langs bekken takast i vare. Det kan ikkje plasserast bygningar eller tiltak som er til hinder for kantvegetasjonen.»
4. Innarbeiding av tilhøyrande omsynssone H560 bevaring naturmiljø i plankart med to meters bredde på kvar side av kant av dagens bekk. Det vert vurdert til om lag 5 meter bred omsynssone i plankart langs dagens plassering av bekken. Vurderingar kring kantvegetasjon som skreve i dette saksframlegget vert innarbeida i planomtalen.
5. Føresegn 7.1.1 b vert supplert med opning for andre fargar:
7.1 «b. Alle nye bygg skal ha fasader i fargane mørk, grå, beige, brun eller annan matt jordfarge, samt tradisjonelle fargar som raud, kvit og oker. Takflater skal ha mørk, matt farge. Bruk av reflekterande materiale som fasadekledning/tekkemateriale på tak skal verte unngått.»
2. Kommunedirektøren får delegert mynde til å gjennomføre endringane før kunngjering av planvedtaket.
Grunngjeving for vedtaket:
Sett ut i frå området sin karakter og dei føringane kommunen har lagt for planframlegget, er løysingane for både bustadutvikling, infrastruktur, uteopphaldsareal med meir vurdert som gode nok. Vedtakspunkta sikrar at omsyn til naturfare, naturmiljø, kantsone ved vassdrag, flaum og moglegheit for fleire farge på bygg. Saka vert lagt fram med vedtakspunkt i staden for innabeiding i plandokument grunna at det er prioritert å tilrettelegge for bustadutvikling snarast mogleg i området.»
Innsyn i dokumenta til reguleringsplanen
Vedtaket medførte endringar i plandokumenta. Dei kan du lasta ned her:
Plankart i tråd med vedtak
Føresegner i tråd med vedtak
Planomtale i tråd med vedtak
Alle dokument finn du i den politiske saka, sak PS 65/2023, vel vedlegg og vidare til dokumentet du vil sjå. I hovuddokument (saksutgreiing) kan du lesa kommunen si vurdering av saka. I saksprotokoll finn du sjølve vedtaket. Det er berre føresegner og plankart som vert juridisk bindande i ein reguleringsplan, og dette er difor dei viktigaste dokumenta. Illustrasjon er berre eit eksempel på korleis ein kan utvikla området.
Plankart med føresegner og planomtale kan skrivast ut eller sjåast på kommunehuset i Sogndal, Gravensteinsgata 17 (Opningstid 10:00-14:00). Dersom du ønskjer kopi eller utskrifter, ta kontakt med tenestetorget på tlf. 57 62 96 00.
Eventuell klage
Fristen for å klaga på vedtaket er etter forvaltingslova § 29 3 veker og er sett til 15.02.2024.
Klagen skal vera grunngjeven og klagar må spesifisera kva det vert klaga over og kva endringar klagar ynskjer. Dersom du klagar så seint at det kan vera uklårt om klagefristen er gått ut, ber me om at du gjev opp når vedtaket kom fram. Sakshandsamar kan gje rettleiing om framgangsmåten ved klage.
Det er mogleg å be om at iverksetjing av vedtaket vert utsett til klagefristen er ute eller klagen er avgjord, jf. forvaltingslova § 42.
Etter at klagefristen er ute, vil me orientera forslagsstillaren om eventuelle innkomne klager på vedtaket.
Erstatning/innløysing
Krav om erstatning etter plan- og bygningslova § 15-2 og krav om innløysing etter den same lova § 15-3 må setjast fram seinast tre år etter at reguleringsplanen er kunngjord.