Siktemålet med planen er å legga til rette for å utvida avfallsanlegget.
Du kan klaga på vedtaket innan 15.02.2024. Klagen må rettast skriftleg til Sogndal kommune, pr. e-post til postmottak@sogndal.kommune.no eller pr. brev til Postboks 153, 6851 Sogndal. Du kan og krevje erstatning innan 3 år.
Om innhaldet i reguleringsplanen
Reguleringsplan for Vangestadvegen 9 består av føremålet anna bygningnar og anlegg, veg, fortau og grønstruktur som buffersone mot tilgrensande areal kring avfallsanlegget.
Vedtak i kommunestyret 26.10.2023
«Detaljreguleringsplan med plankart og føresegner dagsett 16.05.2023 vert vedteke slik det ligg føre.
Saka vert grunngjeve med at planen er i samsvar med arealdelen til kommuneplanen, planforslaget er tilstrekkeleg utgreid og har tilfredsstillande kvalitet til å vedtakast slik den ligg føre.»
Innsyn i dokumenta til reguleringsplanen
Alle dokument finn du i den politiske saka, PS 64/2023, vel vedlegg og vidare til dokumenta du vil sjå. I hovuddokument (saksutgreiing) kan du lesa kommunen si vurdering av saka. I saksprotokoll finn du sjølve vedtaket. Det er berre føresegner og plankart som vert juridisk bindande i ein reguleringsplan, og dette er difor dei viktigaste dokumenta. Illustrasjon er berre eit eksempel på korleis ein kan utvikle området.
Plankart med føresegner og planomtale kan skrivast ut eller sjåast på kommunehuset i Sogndal, Gravensteinsgata 17 (Opningstid 10:00-14:00). Dersom du ønskjer kopi eller utskrifter, ta kontakt med tenestetorget på tlf. 57 62 96 00.
Eventuell klage
Fristen for å klaga på vedtaket er etter forvaltingslova § 29 3 veker og er sett til 15.02.2024.
Klagen skal vera grunngjeven og klagar må spesifisera kva det vert klaga over og kva endringar klagar ynskjer. Dersom du klagar så seint at det kan vera uklårt om klagefristen er gått ut, ber me om at du gjev opp når vedtaket kom fram. Sakshandsamar kan gje rettleiing om framgangsmåten ved klage.
Det er mogleg å be om at iverksetjing av vedtaket vert utsett til klagefristen er ute eller klagen er avgjord, jf. forvaltingslova § 42.
Etter at klagefristen er ute, vil me orientera forslagsstillaren om eventuelle innkomne klager på vedtaket.
Erstatning/innløysing
Krav om erstatning etter plan- og bygningslova § 15-2 og krav om innløysing etter den same lova § 15-3 må setjast fram seinast tre år etter at reguleringsplanen er kunngjort.