Søknad om utsleppsløyve for kap. 12 anlegg

Mange avlaupsanlegg er av eldre karakter, nokon er øydelagde, nokon manglar utsleppsløyve og/eller ikkje innfrir dagens krav til utslepp som vert stilla i forureiningsforskrifta. Dette kan føre til at det må byggjast mange nye avlaupsanlegg i åra framover. Nokon er godt i gang, nokon er i startgropa, og nokon veit at dei truleg vil få pålegg, men ikkje heil kva eller når. 

Å planleggje for ombygging/etablering av eit nytt avlaupsreinseanlegg er ein omfattande jobb. Den som søkjer om å få forureine, har ein stor og viktig jobb med å kartleggje, vurdere og dokumentere viktige forhald for å vera sikker på at løysinga som vert valt gjer minst mogeleg skade på miljøet. 

Planleggingsfasen inkludera t.d. tekniske vurderingar, vurderingar knytt til belastning og dimensjonering, vurdering knytt til reinseprosessar, vurdering av resipientforhald m.m.  I tillegg inneberer planleggingsfasen ei rekkje andre forhald, t.d. knytt til lokalisering av anlegg og reguleringsplanar. 

Under er ei sjekkliste for planlegging og prosjektering av avlaupsreinseanlegg. Sjekklista skildra kva moment den som planlegg eit avlaupsreinseanlegg må ta omsyn til, og i kva rekkjefølgje dei ulike oppgåvene bør løysast. Sjekklista er ikkje ein mal eller fasit på korleis prosjektering av eit avlaupsreinseanlegg skal gjennomførast, men meint som hjelpemiddel og utgangspunkt. 

Ein utsleppssøknad for avlaup (privat avlaupsanlegg <50 pe) må innehalda tilstrekkeleg informasjon som gjer kommunen i stand til å føreta forsvarleg sakshandsaming. Søknadsskjema med følgjande vedlegg sendast til kommunen:

Dokumentasjon som skal leggjast ved i alle søknadar jf. forureiningslova § 12-4:

1. Skriftleg, fullstendig søknad som inneheld dei naudsynte opplysningane kommunen treng for handsaming irekna:
   1. Den ansvarlege sitt namn og adresse
   2. Om utsleppet skal etablerast og drivast i samsvar med krava i § 12-7 til § 12-13, eller om det søkjast om å fråvika desse
   3. Dokumentasjon på korleis utslepp skal etablerast og drivast
   4. Plassering av avlaupsanlegg og utsleppsstad på kart i målestokk 1:5000 eller større
   5. Utsleppet si storleik i personekvivalentar (pe)
   6. Skildring av utsleppsstaden 
   7. Interesser som kan bli påverka av etableringa, som interesser knytt til drikkevassforsyning, rekreasjon eller næringsverksemd 
   8. Oversikt over kven som skal varslast 
   9. Samtykkje frå kommunen si planmyndigheit om utsleppet er i strid med endelege planar etter plan- og bygningslova.
2. Partar og andre som kan blir særleg påverka av saka skal varslast om innhaldet i søknaden. Kopi av varselet skal sendast til kommunen samstundes som partar og andre vert varsla. I varselet skal det komma fram at fråsegn må vera komme til søkjar innan ein frist på minst fire veker etter at varselet er sendt. 
3. Søknad sendast til kommunen etter at fristen for uttale er utgått, saman med kvittering for at varsel er sendt og eventuelle merknadar. 

Samstundes skal andre relevante opplysningar som kommunen treng for at saka skal bli «så godt opplyst som mogeleg» jf. forvaltningslova § 17 sendast inn. Døme på dokumentasjon som må leggjast ved når det er relevant for den enkelte saka:

• Uttale frå landbruk- og naturforvaltning når avlaupsanlegget skal plasserast i dyrka mark eller dyrkbar mark
• Tilstandsvurdering av det eksisterande avlaupsanlegget om anlegget skal behaldast for vidare bruk. Dette kan inkluderast i fagrapporten. 
• Tinglyst erklæring om bruksrett til veg over naboeigedom 
• Tinglyst avtale om fordeling av eigarskap og ansvar for drift og vedlikehald av felles privat avlaupsanlegg
• Profilskildring/teikningar/snitt/grøfteprofil når det skal etablerast filteranlegg. Denne kan inkluderast i fagrapporten  
• Andre samtykkjer eller løyver t.d. frå andre relevante partar, dispensasjonar gjeve av andre etatar/einingar 
  • Dispensasjon strandsone
  • Dispensasjon veg
  • Dispensasjon reguleringsplanar/andre planar
  • Naboerklæring (innanfor fire meter)
  • Tinglys rettigheit i fast eigedom på annan manns eigedom 
• Drifts- og serviceavtale for minireinseanlegg 
• Dokumentasjon på løysing for gråvatn
  • Produktsertifikat  
  • Skildring av anlegg og slamtømming (for prefabrikkert gråvassanlegg)
  • Dimensjoneringsgrunnlag (gjeld slamavskiljar for gråvatn)
  • Skildring av utsleppsstad (t.d. oppbygging og areal av infiltrasjonsfilter)

Føretak som skal ha ansvarsrett under ein av funksjonane som søkjar, prosjekterande, utførande eller kontrollerande ved gjennomføring av søknadspliktige tiltak, må anten ha sentral godkjenning som dekkjer oppgåva som skal utførast, eller senda inn erklæring som stadfesta at føretaket tek på seg det juridiske og offentlege rettslege ansvaret.